Josip Čekolj

Francek

furt nosi gemišt v očima,

furt loži peč z mokrim drvima,

furt moli Sveto Nigdarjevo da se okuple v penezima

Francek je prvi vu familiji dobil posel

vu fabriki i fučkal je kak njezini dimnjaki

i fučkale mu susede gda bi se pentral do svoje hižice,

fučkal je i fučkavi Francek gda bi na seniku ofiral susede

fučkal je vlak

na još jeden radni den

i vračal se Francek z fučkave fabrike

i fučkale su bele žene gda su legle na štreke

i fučkale su bele žene gda se vlak zbog njih prevrtal

šutel je Francek

z dve zmrvljene noge

i gledel plave nebe tražeči nekaj božje

Ljubica je tega dena

kričala vu pletenki črnega vina,

vse dok neje postala sasušeno grozdje z vlažnega podruma

šutel je Francek

gda ga je zmrvljenega podizal brat Lojzek

i gda su susede sa senika skrenule svoja črlena ličeka

***

Imbrek,

trejti sin Ljubice i Drageka,

trinajsti vnuk Babe Jage i Grabara,

navek i vezda je Imbrek jambral svojoj babi Barici,

Imbrek jambra čim mu kokot potegne kapke,

vrti se oko špareta i vrta i trsja i kočaka i gnoja

i nigdar i nigdar nikaj ne štimalo, nigdar nikaj ne za praf,

Imbrek jambra da jambra, vse dok mu vinčeko ne zmuči grleko

pod desnim pazuhom ima brazgotinu v obliku križa

i rad poveda da je sveti muž, i rad kune vsakog sveca,

i rad ječe vsakog pesa, i rad bleji v susedova okna

jednu večer vračal se z svoje cirkve doma,

z usta mu se kadi od rakije i oko nog mu se motaju kače,

v bradu si Imbrek jambra gda ga dešč fati,

nestrplivo zaziva bogeka i jezušeka,

išče zatočišče tev siroti sveti muž,

vse je svojoj babi dal, on nikaj nemal,

naš siroti sveti muž

stane si Imbrek pod neki oreh

zmisli se da v žepu još čuva plosku slivovice,

nadehne se tem izvorem života, potokem istine i poštenja

čez črni grm preleti črni cucek,

črni cucek pred njega skoči, Imbrek zadrveni i zakriči,

črni cucek zavija kak dete, Imbrek zadrveni i zakriči,

črni cucek pozove i šarkanja i groma i grabancijašev sud,

jambravi Imbrek zajafče pod orehom, nebe zablešči, Imbrek zajafče i zdehne

Vse kaj smo šteli

kokotičeki su zakukurikali na črleni mesec

coprnice tiho hodiju oko naših hiž, hračkaju i žlafraju,

hudo je ovo vreme, malo je još ostalo za lepo živlenje,

hudo je vreme, dete drago

vse kaj smo šteli bil je celi svet i vsaki cvet

vse kaj smo šteli bil je mefki veter, topla postela, vruča kava,

zelene hiže i zelene huste, zeleni ljudi i zeleni bregi, zelene reči i zelene lasi

kušnul sam te kad nišči ni gledel sem krovov od listja nad nami,

gda su potiho vile v mojim rukami spravljale pušleke za te

od polskoga cvetja i prepelic perja

vse kaj smo šteli

bile su noči samo za nas

i našu nemoguču decu i našu črlenu pesmu

vse kaj smo šteli bil je celi svet i vsaki cvet